Toshkentda 2,1 tonna giyohvandlik vositalari yoqib yuborildi (foto)

Yangihayot tumanidagi zavodda noqonuniy muomaladan musodara qilingan 2,1 tonnadan ziyod giyohvandlik vositalari yoqish yo‘li bilan yo‘q qilindi. Ularning asosiy qismini kannabis, marixuana, gashish va opiy tashkil qiladi. Foto.

Toshkent shahri Yangihayot tumanida noqonuniy muomaladan musodara qilingan 2 tonna 158,4 kg dan ziyod giyohvandlik vositalari yoqish yo‘li bilan yo‘q qilindi. Bu haqda O‘zbekiston Bojxona qo‘mitasi xabar berdi.

Tadbir “26-iyun — Xalqaro giyohvandlik vositalarini suiiste’moli va noqonuniy aylanishiga qarshi kurashish” kuni munosabati bilan tashkil qilindi.

Yoqilgan giyohvandlik vositalari tarkibi:

37,5 kg geroin;
184,6 kg opiy;
413,8 kg gashish;
28,58 gr ko‘knor boshog‘i;
95,9 kg ko‘knor somoni;
11,2 kg ko‘knor o‘simligi ko‘saklari;
424,7 kg marixuana;
961,3 kg kannabis;
18,73 gr kannabis moyi;
347,85 gr tetragidrokannabinol;
6,48 gr kokain hamda turli xildagi psixtrop va psixofaol moddalar, sintetik giyohvandlik vositalari.
Bojxona organlari tomonidan boshqa huquqni muhofaza qiluvchi organlar bilan hamkorlikda 2023-yilda amalga oshirilgan tadbirlar natijasida aniqlangan jami 785 ta holatda 9 tonna 179,4 kg giyohvandlik vositalari, 17 772 dona psixotrop moddalar, 827,3 gr prekursorlar hamda 197 594 dona va 109 kg 170,353 gr kuchli ta’sir qiluvchi moddalar musodara qilingan.