رئیس جمهور تاجیکستان با مدیر کل سازمان اطلاعات نظامی پاکستان دیدار کرد

تاریخ انتشار : 2024/12/31 ساعت 08:58

امامعلی رحمان، رئیس‌جمهور تاجیکستان امروز، دوشنبه (۳۰ دسامبر، ۱۰ دی) با محمد عاصم مالک، مدیر کل سازمان اطلاعات نظامی پاکستان در شهر دوشنبه دیدار و گفتگو کرد.

به گفته دفتر مطبوعات ریاست جمهوری تاجیکستان، در این ملاقات درباره وضع کنونی و دورنمای روابط سیاسی تاجیکستان و پاکستان بحث و بررسی شده است.

ژنرال ملک سه ماه پیش رهبر نهاد بانفوذ اطلاعات نظامی پاکستان (آی‌اس‌آی) شد. او چانشین ژنرال ندیم انجم شد ه که در سال ۲۰۲۱ با فرمان عمران خان، نخست‌وزیر پیشین پاکستان مدیر کل این نهاد اطلاعاتی شده بود.

رئیس آی‌اس‌آی یکی از مهمترین سمت‌ها در پاکستان است که نفوذ زیادی در امور نظامی، سیاست داخلی و روابط بین‌المللی دارد.

جزئیات زیادی از دیدار ژنرال ملک با امامعلی رحمان منتشر نشده و تنها گفته شده است که امامعلی رحمان روابط سیاسی دو کشور را «باثمر» و دیوار اعتماد را «بلند» توصیف کرده است.

به گفته دفتر مطبوعات ریاست جمهوری تاجیکستان، دو مقام بر تقویت همکاری تاجیکستان و پاکستان در زمینه مبارزه با تروریسم، افراطگرایی، رادیکالیسم، قاچاق مواد مخدر و جرایم فراملی تأکید کردند.

رئیس جمهور تاجیکستان ضمن تأکید بر همکاری در بخش امنیت، تماس دائم مسئولان امنیتی را به منفعت تاجیکستان و پاکستان خواند.

دیدار مدیر کل سازمان اطلاعات نظامی پاکستان از تاجیکستان، همسایه شمالی افغانستان در حالی صورت می‌گیرد که طی یک هفته اخیر درگیری‌هایی در مناطق مرزی میان پاکستان و افغانستان رخ داده است.

در حمَلات هوایی پاکستان در ولایت پکتیکا که به گفته پاکستان پیکارجویان را هدف قرار داده بود، به گفته حکومت طالبان ۴۶ نفر کشته شده‌اند.

دو روز پیش وزارت دفاع طالبان گفت نیروهایش حمَلات تلافی‌جویانه را در خاک پاکستان و در محلی انجام داده‌اند که از آنجا حمَلاتی به خاک افغانستان سازمان‌دهی شده بود.